逆天奇案2丨梁小冰大爆老公冧妻語錄　每次老婆發嬲陳嘉輝靠一招搞掂

TVB劇《逆天奇案2》在昨晚（4月17日）一集劇情峰迴路轉，歷盡不幸的阿蘭（梁小冰飾）最終接受徐仁達（陳嘉輝飾）追求譜黃昏戀。

原來仁達以前正是阿蘭親哥哥幫派中的小混混，足足暗戀了阿蘭30多年，直到今時今日重遇阿蘭終鼓起勇氣起表白。原以為阿蘭終可找到幸福，可惜仁達偏偏在此時無辜捲入一單藏槍案，更遭受警方扣查。

擔心得六神無主的阿蘭向曾愧對自己的莫Sir（李國麟飾）求助，莫Sir在公在私決定動用O記接手案件，可惜依然未能尋獲對仁達有利證據，阿蘭最終竟決定犧牲自己幫仁達頂罪。 

逆天奇案2丨梁小冰與老公陳嘉輝驚喜同框　為角色激減16磅化老妝現身

▲ 《逆天奇案2》

逆天奇案2丨TVB小花輪住讚嘉輝哥

相隔26年再亮相TVB劇集的梁小冰，昨晚一集與真．老公陳嘉輝相隔23年再合作，今次更是兩人第4度演一對！

講到與老公嘉輝哥再度合作，小冰笑言兩人默契依舊，並笑言全靠有嘉輝哥做拍檔：「我哋會喺屋企對好晒啲對白，但唔會排戲，因為到現場先演會撞到個火花出嚟。我好多謝佢，佢係睇住你嘅情緒再去交對白，例如會睇住你啲眼淚流晒落嚟，佢先去下一Part（對白），冇一個拍檔係可以事隔咁多年個默契都仲可以喺度。」

小冰又大讚老公專業：「佢好有紀律，唔止準時仲會早到，所有對白都記到滾瓜爛熟，同埋佢係一個好好先生，唔鍾意同人鬧交，同所有人都交流得好好。」她笑謂與嘉輝哥合作過的女演員都有讚冇彈：「好似鍾嘉欣、蘇玉華、陳瀅、反骨琪（蔣家旻）佢哋見到我，都會話你老公好正，真係一個好好嘅對手，我真係覺得好幸福。」

▲ 《逆天奇案2》

逆天奇案2丨暖男丈夫識冧妻

嘉輝哥在劇中是一位癡心情長劍、對阿蘭呵護備至，現實中嘉輝哥亦同樣是絕世好男人加愛妻號，小冰受訪時開心分享嘉輝哥每日「冧豬語錄」：「我老公好玩得，每日起身都會話：『你好靚喎』，結婚20幾年都係咁，講嘢好甜，就算我捲到個頭好似包租婆咁，佢都話：『點解可以咁靚』。」

小冰坦言，兩人亦有鬧交時，但嘉輝哥僅以一招便能成功收服老婆，小冰透露：「我性格係一有問題就會blablabla講晒出嚟，佢就叫我慢慢講、唔好嬲，同埋叫我可以選擇用另一種方式（表達），例如喺最嬲時唔好講嘢，寫出嚟。以前我就寫晒喺張紙上，寫完幾千字都已經唔嬲啦，依家就轉用WhatsApp。」

她笑謂，兩人結婚多年，現在已經是無聲勝有聲：「依家唔使講嘢都知大家諗咩㗎喇，唔使咁多說話同溝通，呢個就係默契！」

▲ 《逆天奇案2》

逆天奇案2丨陳嘉輝年青時勁靚仔

其實嘉輝哥除了是暖男丈夫外，年青時青靚白淨十分英俊。入行前曾於政府土木工程拓展署任職工程監督，後來被相中拍廣告後而入行，1986年簽約TVB旗下藝人，在1988年主演處境劇《都市方程式》、1991年劇集《我係黃飛鴻》都與郭富城拍檔，兩大花樣少年齊合作。

而陳嘉輝因拍《兄兄我我》與梁小冰相戀，拍拖期間合作台灣劇集《新梁山伯祝英台》紅爆港台。於2000年，二人結束愛情長跑結婚，兒子陳洋溢（Lewis）於7年後出生。

▼點擊圖片放大

+5

+4

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5